کوردی چوارپارچە لە رۆژهەڵات

 

✍:شاهۆ حوسێنی

 کورد لە ڕۆژهەڵاتی کوردستان چوارپارچە بوە:

پارچەی یەکەم: نەتەوەخوازن، شوێن شووناس و بوونێکی سەربەخۆ لەگوێن سوژەیەک و بوونێکی خۆبنیادنەر کەوتوون، ئەوان لەسەر ئەم باوەڕەن کە وەک هەموو سوبژەکانی‌تر ماف و شەرعییەتی بنیادنانی بوونێکی سەربەخۆیانە و بڕیاردانێکی سەربەخۆیانەیان لەمەر شێوازی بوون و شووناسی بوونیان هەیە

پارچەی دووهەم: چەپی ئۆڕتۆدۆکسین، ئەوان بەشێکیان لەژێرکارتێکەری لێنینیسم هەر باوەڕیان بە کوردبوون، کوردایەتی و نەتەوەخوازی نیە، بەشێکی‌تریان لەژێر کارتێکەری ئەندێشەکانی دوایی ئۆجەلان باوەڕیان بە نەتەوەخوازی نەبوو، ئەوان باسیان لە کۆنفدێرالیزمی دیمۆکراتیک دەکرد و ئیستاش باسی برایەتی تورک و عەڕەب دەکەن، بەشێکی‌تریشیان ئەگەریش باسی نەتەوەخوازی دەکەن، لەدەلاقەی هەمان کلتووری ئۆڕتۆدۆکسێوە خوێندنەوەی بۆ دەکەن، سەرچاوەی شرۆڤە و خوێندنەوەیان بۆ کورد، کوردایەتی و کوردستان، دەقەکانی ئۆرتۆدۆکسیە.

پارچەی سێهەم: ئیسلامخوازەکانن کە لە دەلاقەی ئایدۆلۆژی ئیسلامیوە خوێندنەوە بۆ کورد و کوردایەتی دەکەن، سەرچاوی فام، شرۆڤەو ئاگاییان، دەقەکانی ئایینی و ئیسلامیە.

پارچەی چوارەم: ئێرانچێکانن، ئەوان خۆیان لەناو چوارچێوەی ئایدۆلۆژی ئێرانیستیدا دەبیینەوە، سەردەمی پەهلەوی ئەندامی پان ئێرانیسم بوون و سەردەمی کۆماری ئیسلامی لەناو حەساری دەسەڵاتی کۆماری ئیسلامیدا دەور دەگێڕن، خوێندنەوە بۆ کورد و کوردایەتی دەکەن.

پارچەی یەکەم و دووهم لە دیازپۆرا بە ڕواڵەت و لەڕێی کۆنفرانس و دانیشتنی فۆڕمالیتەو ڕواڵەتی حەول بۆ یەکگرتوویی دەنوێنن، بەڵام لە دەرەوەی دەرگای کۆنفرانسەکان تێ‌ناپەڕێت.

پارچەی سێهەم‌و چوارەم هەرچەند بە دژ پارچەی یەکەم و دووهەمن، بەڵام بەهیچ شێوەیەک ناتوانن ڕیککەون، تاقمێکان لەبەرەی بناژوێخوازەکاندا کایە دەکەن و تاقمێکیان لە بەرەی بەناو رێفۆڕمخوازیدا

ئاکام:

یەکگرتوویی کورد لە نامحاڵەکانی مێژووی هاوچەرخ و بگرە سەد ساڵی داهاتووشە، دابڕاوی کورد لەهەناوی ئایدۆلۆژی و دابڕاوی زەینیدا ڕوویداوە و بە کۆنفڕانس و سمیناریش چارەسەر نابێت، ئەوەی دەبێ بگۆڕدرێت، ئایدۆلۆژی، فام، زەین و کلتوورە.